Como ven sendo xa case unha tradición, o pasado sábado 23 de agosto Amizade organizou unha comida de confraternización entre os seus socios/as, achegados/as e amigos/as no piñeiral da praia de Montalvo.
Sobre as 12:00 foron chegando os primeiros asistentes, que foron compartindo experiencias e preparando as mesas para o xantar.
A comida estivo animada e permitiu que todos e todas gozaramos da boa e agradable compañía e dun contorno natural tan peculiar.
Pola tarde tiveron lugar varias actividades paralelas; algunhas persoas aproveitaron para descansar tranquilamente, outras xogaron ao xadrez, ás cartas e/ou pelota, outras foron pasear e algúns aproveitaron para gozar do mar e da area da praia.
Nesta ocasión, ao redor de 35 persoas puideron gozar dunha xornada de lecer que seguro que se seguirá repetindo en vindeiros anos. Sobre ás 19:00h recolleuse todo e cada un/unha regresou á súa casa.
Contouse novamente coa colaboración voluntaria de varias persoas que se encargaron de trasladar as mesas, colocalas e recollelas, axudar a quen o precisaba, reservar o sitio a primeira hora da mañá, etc. Sempre hai que valorar e agradecer estas colaboracións voluntarias, sen as cales non sería posible organizar este tipo de actividades.