19/06/18 | Noticias, Sensibilización
Este ano a Xornada Multideportiva levouse a cabo en dous días. O primeiro foi o venres 15 de xuño. Ese día asistiron máis de 120 alumnos e alumnas dos coles da comarca, concretamente Froebel e Santo André de Xeve. O segundo día foi o sábado 16 e asistiron algunhas entidades coma AMARAI, ADISBISMUR e ASSEII. Foron dous días cheos de deporte adaptado, no que participaron tamén viandantes que pasaban por alí; o sábado ata veu saudarnos Indurain!
Cabe dar as grazas a todas as persoas participantes, o voluntariado, ao cantante Tomas Outsider e aos patrocinadores: Concello de Pontevedra, Deputación de Pontevedra, La caixa e Froiz. Sen todos vos non houbera sido posible! Vémonos para o ano que ven!
13/04/18 | Noticias, Sensibilización
O 12 de Abril de 2018, Amizade levou a cabo unha xornada de #accionguerrilla na que se constatou que boa parte da sociedade aparca, literalmente, sobre os nosos dereitos. Somos coñecedores de que a xente emprega as prazas de aparcadoiro para persoas con mobilidade reducida para facer os seus “recados”.
Por este motivo decidimos organizar esta actuación nunha praza de aparcadoiro situada en fronte dunha panadería en Monte Porreiro, a escasos metros do noso local social, onde a xente fai uso dela de xeito inadecuado para coller o pan.
Ao falar con eles/as, todos poñen as mesmas excusas, a maís común, a de coller o pan. Tamén que só son 5 minutos, descargar algunhas mercancías, ou que xa saben que non poden parar e non pretendían ofender ou molestar. O certo é que, aínda sen querer molestar, trátase dunha acción ilegal segundo o código de circulación; e pouco ética, xa que afecta aos dereitos, neste caso, aos das persoas con discapacidade.
Con esta acción pretendemos sensibilizar ao conxunto da sociedade sobre a necesidade de respectar as prazas de aparcadoiro que impiden ás persoas con discapacidade dispoñer delas, e por ende, participar autonomamente na circulación víal.
23/02/18 | Noticias, Sensibilización
O pasado mércores 21 de febreiro organizamos unha charla de sensibilización no Colexio de Campolongo, cos rapaces e rapazas de primeiro de primaria. Os vindeiros mércores 28 e 7 de marzo está previsto facer outras dúas con segundo e terceiro. Do mesmo xeito, no mes de abril e maio organizaremos cos restantes cursos. Os obxectivos principais que se pretende abordar son: visibilizar e coñecer a discapacidade, rachar prexuizos, sensibilizar cara a prevención de accidentes, fomentar a linguaxe inclusiva, etcétera.
02/02/18 | Noticias, Sensibilización
O 31 de xaneiro Amizade organizou unha charla de sensibilización no IES Sánchez Cantón desde as 13:35 até as 14:40, e impartiuse ó alumnado do FP Técnico superior en animación de actividades físicas e deportivas.
A charla foi desenvolta por tres socios que procuraron, por un lado, sensibilizar respecto ás situacións de exclusión que viven as persoas con discapacidade (falta de accesibilidade, axudas técnicas caras, respeto polas plazas de aparcadoiro destinadas ás persoas con discapacidade, etc.) e por outra banda, dar a coñecer as súas experiencias persoais no eido deportivo. Neste sentido, eles practicaron ou practican: vela adaptada, ciclismo con handbike, taekwondo adaptado, baloncesto, ximnasio, entre outras.
