02/10/23 | Incidencia política, Noticias
O pasado 27 de Setembro, Paulo Fontán (presidente da asociación) e Jorge Esperón (tesoureiro), reuníronse co alcalde de Poio Ángel Moldes.
A reunión serviu para que se producira a presentación oficial entre o novo alcalde e a asociación e obtívose o compromiso asumido por ambas partes de manter un diálogo fluído e unha colaboración constante para evitar que no futuro se produzan situacións de discriminación por falta de accesibilidade, así como ir solucionando paulatinamente aquelas cuestións que son susceptibles de mellora.
Máis no concreto, na reunión abordáronse cuestións relativas á accesibilidade (estudando a posibilidade de aprobar unha ordenanza municipal de accesibilidade, instando aos técnicos municipais a ser máis esixentes no outorgamento de licenzas para locais de uso público que non cumpran a normativa, a ampliación da oferta de baños públicos accesibles, garantir a accesibilidade aos eventos culturais e festivos, ou citar dificultades concretas en puntos localizados do Concello), cuestións relativas ao transporte (correcta sinalización e deseño das marquesiñas, o cumprimento da reserva de taxis adaptados ou o deseño e localización das prazas de estacionamento reservadas para persoas con mobilidade reducida), da situación do emprego público e a reserva de postos para persoas con discapacidade, a incorporación de cláusulas sociais nas diferentes licitacións de contratos públicos de obras ou servizos, etc.
11/05/22 | Incidencia política, Noticias
O pasado 4 de maio dous membros da directiva de Amizade tiveron unha reunión co alcalde de Poio, Luciano Sobral, para abordar a o tema da accesibilidade dos edificios municipais, entorno urbano, aparcamentos e outorgamento das tarxetas de estacionamento entre outras.
Tras a reunión acordouse seguir mantendo contacto entre ambas institucións para seguir traballando conxuntamente e mellorar a actuación municipal con respecto a esta temática
03/05/22 | Incidencia política, Noticias
No día de hoxe tivo lugar un acto reivindicativo diante do EVO (Equipo de Valoración e Orientación da discapacidade) de Pontevedra conxuntamente con outras cidades de toda Galicia.
A finalidade é reclamar os grandes retrasos nas valoracións que poden chegar ata os 18 meses de espera, supoñendo isto unha espera importante no acceso a servicios e prestacións das que poidan ter dereito entre outras cousas, emprego, educación, accesibilidade, saúde, etc. Ao acto acudiron varias persoas socias da entidade facendo valer os seus dereitos e expoñendo os seus testemuños a diferentes medios de comunicación que se desprazaron ata o lugar.
03/02/21 | Incidencia política
A través do servizo de accesibilidade de Amizade, dende o cal a asociación ofrece orientación sobre deseño de espazos, materiais, asistencia técnica e elaboración de propostas a toda persoa que o solicite, preténdese transmitir o coñecemento e experiencia da entidade de xeito que poida ser aproveitado polos profesionais responsables en proxectos de deseño e execución das obras públicas ou privadas.
É así que no mes de Febreiro Demetrio Gómez (concelleiro de Obras Urbanas) e Paulo Fontán (presidente de Amizade) mantiveron unha reunión telemática sobre os proxectos que o Concello levará a cabo na cidade: a reforma da praza de Barcelos e da rúa da Santiña.
Paulo Fontán destacou unha serie de elementos non definidos nos proxectos básicos como o réxime de aparcamento e prazas adaptadas ou a accesibilidade da zona.
Pola súa banda, Gómez comprometeuse a incorporar ambos detalles nos proxectos de execución.
