Cursos plan FIP

O plan nacional de Formación e Inserción Profesional comprende o conxunto de accións de formación profesional ocupacional dirixidas aos traballadores desempregados, para proporcionarlles cualificacións requiridas polo sistema productivo e insertalos laboralmente, cando os mesmos carezan de formación profesional específica ou a súa cualificación resulte insuficiente ou inadecuada.

A programación destes cursos elabóraa o INEM sempre suxeita aos obxectivos establecidos na planificacións do Ministerio de Traballo e Asuntos Sociais, en base as necesidades de formación da rexión e o sector productivo, detectados polos/as orientadores/as do SIL, e a través das contratacións dos últimos 3 anos, así como da inserción dos alumnos/as xa formados.

Dentro de todas as actividades e talleres organizados en Amizade procuramos que para cada Alumno/a se elabore un programa individual – adaptado a súa capacidade e estructuras cognoscitivas persoais – de intervención física, psicolóxica ou de iniciación ao mundo laboral nos casos que sexa posible.

Este programa integrado por diferentes talleres terá como finalidade a habilitación social e a promoción profesional das persoas con discapacidade tendo en conta as súas necesidades e as necesidades do seu entorno.

A participación de todos os alumnos nas actividades supón ao mesmo tempo unha situación de respiro familiar.

Diariamente, en horario de atención de 8:30 a 14:00, no local social de Amizade, infórmase a todas as persoas que o soliciten. Proporciónase información de moitos temas, tales como os beneficios do certificado de “minusvalía”, axudas económicas e técnicas, accesibilidade e supresión de barreiras, formación, asociacionismo, emprego, etc.

Todas as consultas recibidas en Amizade son rexistradas nunha base de datos proporcionada por COGAMI. A resolución das mesmas realízase de forma inmediata polo persoal de Amizade, sempre que non requira un asesoramento profesional específico; neses casos, a consulta é trasladada ás oficinas centrais que COGAMI ten en Santiago de Compostela. Alí un equipo multidisciplinar de profesionais (avogados/as traballadores/as sociais, economistas...) redacta un informe coa resolución da consulta efectuada en non máis de catro días. Unha vez recibido este informe trasládase a resolución adoptada a persoa interesada.

Actividades asociativas

Particípase nas reunións e asembleas da FAMFIP e de COGAMI das que Amizade forma parte.

Mantéñense contactos periódicos con responsables políticos da comarca de Pontevedra para tratar temas ordinarios de traballo continuo ou algunha cuestión particular que nos sexa transmitida por algún socio/a.

A elaboración de comunicados de prensa sobre cuestións de actualidade que afecten ao grupo social das persoas con discapacidade é unha tarefa continua que nos permite estar presentes nos medios de comunicación, contribuíndo así ao cambio social que todos esperamos.

As actividades de ocio e tempo libre véñense desenvolvendo pola asociación desde o seu nacemento. Favorecen a integración na comunidade das persoas con discapacidade a través da participación social á vez que melloran as relacións interpersoais.

Téñense programado, nos últimos anos, visitas a lugares de interese (museos, bodegas,...), asistencia a espectáculos deportivos, xantares e ceas, etc.

No 2008 continuarase ofrecendo aos socios/as opcións onde ocupar o seu tempo de lecer, procurando que sexan actividades que beneficien a independencia e a participación da persoa con discapacidade así como a normalización social do uso dos bens e servizos de ocio por todas as persoas.

O noso centro ten por finalidade satisfacer as necesidades de promoción profesional e habilitación integral das persoas con discapacidade na súa zona de residencia, sempre axustadas as súas características persoais e polo tanto cun itinerario específico que lles permite superar os obstáculos que as veces supón a súa discapacidade.

Non pretende ter un carácter finalista ou residual, no sentido de que as persoas que participan no centro permanecen alí sen máis posibilidades de avance, senón que se contempla como unha posibilidade máis dentro do sistema laboral, sempre que sexa factible; e dicir, como unha etapa previa á formación ocupacional ou ao emprego, tanto nun entorno protexido (centros especiais de emprego) como nun emprego ordinario.

Servizo de transporte adaptado

O servizo de transporte adaptado constitúe unha verdadeira necesidade para as persoas con mobilidade reducida. A ausencia de transporte público accesible dificulta a participación de moitas persoas nas actividades do centro polo que se fai necesario contar cun vehículo propio de transporte adaptado que posibilite esa participación.

Amizade solicitará financiamento a institucións públicas e privadas co fin de poder contar cunha furgoneta no prazo máis breve posible.