O pasado día 18 tivo lugar en Pontevedra a presentación de dous autobuses ecolóxicos, á que asistiron diversos representantes políticos e veciñais. A empresa fala da menor contaminación e das medidas de seguridade como as principais vantaxes destes novos vehículos, esquecendo que a calidade do servizo non pode mellorar se no se lle permite o seu uso a todas as persoas.

Desde Amizade lamentamos a perda dunha nova oportunidade; unha oportunidade de contar con vehículos de transporte público que poidan usar todas as persoas, posto que os referidos autobuses ecolóxicos prolongan a discriminación que veñen soportando as persoas con discapacidade ao non permitirlle o seu uso, porque non son accesibles.

Este feito ven amparado pola desidia das administracións e pola escasa presión que facemos desde o movemento asociativo de persoas con discapacidade.

En canto ás administracións, desde Amizade non entendemos como se pode seguir permitindo que se poñan en funcionamento vehículos que discriminan, que marxinan a unha parte da poboación impedindo que os poidan usar. A administración autonómica non debería dar permiso de circulación a vehículos que incumpren as propias leis autonómicas, así como o concello non pode valorar como mellora substancial nin agradecer o esforzo da empresa nuns vehículos que, repito, discriminan a moita xente. E na presentación tamén había representantes do movemento asociativo veciñal pero ningún de asociacións de persoas con discapacidade.

E as asociacións tamén temos a nosa parte de responsabilidade ao non ser quen de facerlle ver ás administracións que a nosas vidas non son máis difíciles por estar nunha cadeira de rodas senón por non contar coas condicións do entorno axeitadas; con autobuses nos que poder viaxar, ou trens ou taxis, tendas nas que poder comprar, ou restaurantes nos que poder comer.

Desde Amizade imos comezar a utilizar unha segunda vía de actuación; ademais de seguir mantendo as conversas que sexan precisas con administracións e empresas, tamén imos utilizar todos os recursos legais que estean á nosa disposición para garantir que os dereitos que todas as persoas temos non sexan vulnerados. Comezaremos estudiando a posibilidade de demandar xudicialmente á empresa Rías Baixas (así como as administracións que poidan ter algunha responsabilidade) pola posta en funcionamento de dous vehículos que incumpren o Decreto 35/2000.

Pensamos que no ano 2007 xa non podemos seguir permitindo que as cousas sexan así porque si; todas as persoas temos os mesmos dereitos e non imos permitir por máis tempo que se nos siga tratando como cidadáns e cidadás de segunda. Todo o mundo coñece o que aconteceu en Estados Unidos cando os afroamericanos se negaron a utilizar o autobús ata que non o puidesen facer en igualdade de condicións que os brancos; moitos días camiñando longas distancias ata que conseguiron modificar o status quo que existía ata entón. Pero nós non temos esa capacidade de influencia, non somos tantos e moitas veces xa temos bastante con poder estudiar ou traballar, ou ir ao cine ou a bailar. Só coa implicación de toda a sociedade, con que se perciba a accesibilidade como un beneficio social, que favorece a toda a poboación, e que dese xeito toda a poboación reclamase bens e servicios accesibles conseguiríamos unha sociedade xusta con todos os seus membros. Imaxínense por un momento que pasaría se toda a poboación (ou unha parte significativa dela) se negase a utilizar o autobús que non fose accesible, utilizando unicamente os poucos que si o son; non se tardaría moito tempo en cambiar o status quo.

Amizade continuará o traballo que leva case 20 anos desenvolvendo co obxectivo de conseguir unha sociedade xusta para todos e todas, e para elo utilizará todos os medios que estean ao seu alcance; en breve presentaremos a nosa primeira demanda xudicial.