O vindeiro día 15 de setembro de 2007 celebrarase en Madrid a I Marcha pola Visibilidade da Diversidade, convocada polo Foro de Vida Independente. Unha marcha festivo-reivindicativa na que se pretende expresar que a diversidade existe, está presente na nosas vidas, e que lonxe de ser un problema constitúe unha verdadeira riqueza para unha sociedade. Ao mesmo tempo, incidirase tamén na necesidade de alcanzar a Accesibilidade Universal, na integración laboral das persoas con discapacidade e no logro de autonomía e liberdade para todas as persoas con necesidades de apoio xeneralizadas.

Amizade coincide na necesidade de insistir na reclamación destes dereitos e por iso apoia a celebración desta marcha. Desde Amizade pensamos que xa está ben, que xa é tempo de mudar as cousas, que no ano no que estamos non pode seguir habendo cidadáns de primeira e cidadáns de segunda. 25 anos despois da aprobación da LISMI, e catro anos despois da aprobación da LIONDAU seguimos contando con edificios, transportes ou medios de comunicación que discriminan a unha parte da poboación impedíndolle o seu uso; e, ollo!, non porque certas persoas non poidan camiñar ou escoitar senón porque os equipamentos e servicios non están deseñados desde o principio para que poidan ser usados por toda a poboación; non se aplica o chamado Deseño para Todos/as.

Tampouco a Lei de Autonomía Persoal e Atención a Persoas en Situación de Dependencia vai cubrir as necesidades das persoas que precisan apoios para o seu desenvolvemento diario posto que o nivel de prestacións e servicios que se van a ofertar está moi por debaixo das necesidades reais destas persoas. Unha lei que podemos considerar como un avance pero non vai sei quen de cumprir todas as expectativas creadas; perdeuse unha oportunidade de facer unha boa lei.

Amizade leva case 20 anos loitando polos dereitos das persoas con discapacidade e o seguirá facendo na medida das súas posibilidades. As últimas actuacións levadas a cabo foron a solicitude de entrevista co concelleiro de transportes e coa concelleira de deportes para tratar cuestións relacionadas coa discapacidade nas áreas de goberno citadas. Procederase nas próximas semanas a solicitar reunións coas demais áreas de goberno municipal de cara a tratar a cuestión da accesibilidade como algo transversal a todas as áreas de goberno municipal. Agardamos poder ter estas xuntanzas o antes posible para avanzar así cara unha cidade para todos e todas.