O 20 de outubro un grupo de socios e socias de Amizade participaron nunha xornada de ocio que transcorreu en diversos lugares do concello do Grove.

A primeira actividade do día foi unha ruta en catamarán pola ría de Arousa que durou hora e media e na que se puideron apreciar diversas especies mariñas no seu medio natural. Tamén se puideron degustar uns mexillóns ao vapor elaborados no mesmo barco.

Despois realizouse unha visita ao acuario do Grove onde un guía fixo diferentes explicacións sobre as peculiaridades dos peixes que ían observando e que produciron máis dunha sorpresa entre os asistentes.

O xantar tivo lugar no restaurante "O Chiringuito" onde se puido gozar dunha comida agradable e repoñedora despois do axetreo matinal.

Pola tarde tivo lugar a visita á lonxa do Grove onde se asistiu á subasta de peixe e marisco. Unha actividade interesante polo significado que ten a pesca e o marisqueo para a economía da zona e porque se puideron ver en directo diversas especies de peixe e marisco realmente frescas.